Haurtzaindegiak ateak ireki ditu familiei funtsezko zerbitzua bermatzeko

Protokolo eta egoera berrira egokitzeko asteetako lana egin ostean, gaur ireki ditu berriro ateak haurtzaindegiak, familia eta lana kontziliatzeko ezinbestean zerbitzu hori behar dutenentzako. COVID-19ak eragin handia izan du familietan; kontziliazioa nekeza izan da guztientzat, eta kasu batzuetan haurtzaindegiko zerbitzua ezinbestekoa da une honetan. Horregatik, haurtzaindegiak ateak ireki ditu gaur.

Durango Jesuitak ikastetxeak hasieratik dihardu egoera posible ezberdinetara egokitzeko planak eta protokoloak prestatzen, unean uneko arauak errespetatuz, familien beharretara egokitzeko. Hala, duela aste batzuk hasi ginen ikastetxea egokitzen. Garbiketa lanak zorroztu dira eta beharrezko material guztia erosi, hala nola, gel higienizatzaileak, musukoak, tenperatura urrutira hartzeko gailuak, esparruak banatzeko posteak eta abar luze bat. Gainera, hezitzaile guztiek ikasi behar izan dute modu berri baten jarduten.

Haurtzaindegira bueltan

0 eta 2 urte arteko hemezortzi haur itzuli dira gaur haurtzaindegira. Ikastetxea zertxobait aldatuta aurkitu dute, baina han ziren beren betiko irakasleak, hiru hilabeteren ondoren haurren itzulera egunean laguntzeko.